ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔩᑦ ᖃᓄᐃᓕᕐᐱᑖ?

ᐱᒋᐊᕈᑎᒃ:

ᖃᓄᐃᓕᖓᓂᖏᓐᓂᑦ ᐊᓪᓚᓯᒪᔪᐃᑦ

ᖃᓄᐃᓕᕐᐱᑖ? 2017 ᐊᒥᓱᐃᓕᖓᔪᓂᑦ ᖃᐅᔨᓴᕐᓂᖅ, ᐊᑦᔨᖃᖕᖏᑐᖅ ᐊᒥᓲᓂᖏᑎᒍᑦ ᖃᐅᔨᓴᕐᑕᐅᓛᕐᑐᐃᑦ ᖃᓄᐃᓕᖓᓕᕐᓂᖏᑦ ᐃᓗᓯᖏᑦ ᓄᓇᕕᒻᒥᐅᑦ ᐃᓄᖁᑎᖏᑦᑕ. ᖃᐅᔨᓴᕐᓂᑐᐃᓐᓇᐅᒐᓂᓗ, ᖃᐅᔨᒪᓂᕐᒧᓕᖓᔪᖅ. ᖃᓄᕐᑑᓂᕐᓄᓗ. ᐱᒍᓐᓇᓯᓂᕐᒧᓕᖓᔪᖅ


ᒫᓐᓇ ᖃᓄᐃᓕᕐᐱᑖ? ᑭᐅᒍᑎᖓ ᑖᑦᓱᒪᐅᑉ ᐊᐱᕐᓲᑎᐅᑉ ᓄᓇᕕᒃ ᐱᔭᕆᐊᑐᔪᑲᓪᓚᐅᓂᕐᓴᐅᓕᕐᑐᖅ ᑌᑦᓱᒪᓂᐅᓯᒪᒻᒪᑦ. ᑭᖑᓪᓕᐹᒥ ᖃᐅᔨᓴᕐᓂᐅᓯᒪᔪᒥᒃ ᖃᓄᐃᑉᐱᑖ 2004?ᒥᑦ ᖃᓄᐃᓕᖓᓂᖏᑦ ᐊᓯᑦᔨᓯᒪᓪᓗᑐᕐᖁᑦ.


ᓄᓇᕕᒃ ᐊᓯᑦᔨᕙᓪᓕᐊᔪᖅ ᐃᓗᓯᖏᑦᑕᓗ ᑭᖕᖒᒪᒋᔭᖏᑦ ᐃᓚᐅᒻᒥᑎᓪᓗᒋᑦ, ᐱᓗᐊᕐᑐᒥᒃ ᐃᓅᓱᑦᑐᖁᑎᕗᓐᓂᑦ ᖃᐅᔨᓴᕈᑎᒋᓚᖓᔭᕗᓐᓂ ᐊᒥᓲᓂᕐᐸᐅᓱᑎᑦ ᐃᓗᓯᓕᕆᓂᕐᒥ ᖃᐅᔨᓴᕐᓂᒥ. ᐊᒥᓲᓂᖏᑦ ᐃᒻᒥᓂᐊᖃᑦᑕᑐᐃᑦ ᐃᓅᓱᑦᑐᖁᑎᕗᓐᓂ ᐅᖁᒣᑦᑐᓚᕆᐊᓘᕗᖅ. ᐃᕐᐸᓂᖏᑦ ᑯᔭᓐᓂᑎᒍᑦ ᐋᓐᓂᐊᑖᖑᓲᑦ ᐃᓱᒫᓗᑎᒻᒪᕆᐅᓕᕐᖁᖅ. ᐳᕙᓪᓗᓂᖅ ᐅᑎᕐᓯᒪᔪᖅ ᓲᖑᔪᑲᓪᓚᐅᓱᓂ ᐃᓚᖏᓐᓂ ᓄᓇᓕᖁᑎᕗᓐᓂᑦ. ᓄᓇᕕᒻᒥ ᐃᓪᓗᐃᓂᐊᖏᓐᓇᑐᑦ. ᐊᒥᓱᖕᖑᐸᓪᓕᐊᑐᐃᓐᓇᓱᑎᓗ ᐃᓚᒌᑎᒍᑦ ᐱᓗᑲᓐᓃᑦ ᓄᕐᖃᑎᒐᓱᒋᐊᓕᕗᑦ, ᐅᐃᕆᒪᓃᑦ, ᓂᕿᖃᑦᓯᐊᖏᓐᓂᓗ.
ᑖᒃᑯᐊ ᐃᓚᖏᑦ ᓯᕗᓪᓕᐅᔨᒐᓱᓚᖓᔭᕗᑦ ᖃᓄᐃᓕᕐᐱᑖ? 2017 ᑲᒪᒋᒐᓱᓚᖓᔭᕗᑦ. ᓄᐃᑦᓯᓗᑎᑦ ᐊᓪᓚᓯᒪᔪᖕᖑᓂᐊᕐᑐᑦ ᖃᓄᐃᓕᖓᓕᕐᒪᖔᑕ ᐃᓱᒪᒥᒍ, ᑎᒥᒥᒍᑦ ᐃᓗᓯᖏᑦ ᓇᐅᑐᐃᓐᓀᑦ ᓂᕈᐊᕐᑕᕕᓃᑦ ᓄᓇᓕᒻᒥᐅᑦ ᐃᓘᓐᓇᖏᓐᓂ 14ᓂᑦ ᓄᓇᓕᓐᓂ ᓄᓇᕕᒻᒥ. ᓄᓇᕕᒻᒥᐅᑦ ᐊᑐᕈᓐᓇᓯᓛᕐᑐᑦ ᖃᐅᔨᒍᑎᕕᓂᕐᓂᑦ ᓄᑖᓂᑦ ᖃᓄᕐᑑᕈᑎᑦᓴᓕᐅᕈᑎᒋᓯᓗᒋᑦ ᓯᕗᕐᖐᒐᓱᓐᓂᓄᓕᖓᔪᓂᑦ ᐃᓗᓯᕐᒧᓕᖓᔪᓂᑦ ᖃᓄᐃᓘᕈᑎᑦᓴᐅᒐᔭᕐᑐᓂᑦ ᐱᒍᑦᔨᒍᑎᓂᓗ ᓯᕗᓂᕐᒥ. 


ᓂᕆᐅᒋᔭᐅᔪᖅ ᑮᓇᐅᔭᑎᒍᑦ ᐱᕙᓪᓕᐊᒐᓱᓐᓂᒥᒃ ᐅᑭᐅᕐᑕᑐᒥ ᐊᑐᐃᓐᓇᕈᕐᑎᓂᕐᒥ ᐊᒻᒪᓗ ᓱᕐᕃᓚᕆᒍᑎᐅᒍᓐᓇᑐᐃᑦ ᐃᓅᓯᑦᑎᓂ ᐱᑦᔪᑎᒋᐊᓪᓚᐅᕗᖅ ᓱᒐᒥ ᐱᒻᒪᕆᐅᒋᐊᖓᓂᒃ ᐊᓪᓚᓯᒪᔪᖕᖑᑎᑕᐅᓗᑎᑦ ᐃᓘᓐᓈᒍᑦ ᐃᓗᓯᖓᓅᓕᖓᔪᐃᑦ ᐃᓄᖁᑎᑦᑕ. ᓄᐊᑕᐅᒪᔪᑦ ᐊᑐᕐᑕᐅᓛᕐᑐᑦ ᐊᑦᔨᒌᖕᖏᓂᖏᓐᓂᑦ ᖃᐅᔨᒐᓱᒍᑎᐅᓗᑎᑦ ᐅᓪᓗᒥ ᖃᓄᐃᓕᖓᓂᐅᔪᓂᑦ ᐃᓗᓯᕐᑎᒍ ᐃᓄᓕᕆᓂᕐᑎᒍᓗ ᓱᕐᕃᓂᕆᒍᓐᓇᑕᖏᑦ ᓄᓇᓕᑦᑎᓂᑦ ᐊᑐᐃᓐᓇᕈᕐᑎᓂᐅᔪᖅ ᐅᑭᐅᕐᑕᑐᒧᓕᖓᔪᖅ.
ᖃᓄᐃᓕᕐᐱᑖ? 2004 ᖃᐅᔨᓴᕐᓂᕕᓂᖅ ᐊᕐᖁᓯᐅᕐᓂᖁᖅ ᐊᒥᓱᓂᑦ ᐊᑯᓂᐅᓕᖓᔪᓂᑦ ᐃᑲᔪᕐᓯᒍᑎᓕᐊᕕᓂᕐᓄᑦ ᐱᓗᐊᕐᑐᒥ ᐃᑲᔪᕐᓯᓱᓂ ᒪᓗᓐᓇᓯᒍᑎᓕᐅᕐᓱᓂ ᐋᓐᓂᐊᓯᐅᕐᑕᐅᓗᑎᓗ ᐊᒫᒪᒃᑯᑦ ᒪᓂᕐᓇᓖᑦ ᐋᕐᕿᓯᕇᕐᑐᓂᑦ, ᓄᐃᑦᓯᒍᑎᐅᑦᓱᓂ ᐊᑦᑐᐃᓯᐊᕐᓂᖅ ᐊᑦᑐᐃᓯᐊᖕᖏᓂᕐᓗ ᓯᕗᕐᖐᒐᓱᓐᓂᒧᓕᖓᔪᒥᒃ ᖁᓄᔪᕐᓂᐊᑕᐅᖃᑦᑕᓂᐊᖕᖏᒪᑕ ᐱᐊᕃᑦ ᐊᒻᒪᓗ ᓄᐃᑦᓯᒍᑎᐅᑦᓱᓂ ᓄᑖᓂᑦ ᓄᓇᓕᓕᒫᑎᒍᑦ ᖃᓄᐃᓘᕈᑎᑦᓴᖏᓐᓂᑦ ᐃᓗᓯᕐᒧᓕᖓᔪᓂᑦ ᐊᑐᐃᓐᓇᕈᕐᑎᓂᕐᒥᒃ. 


ᐅᓇ ᑲᔪᓯᔪᒥᒃ ᐃᑲᔪᕐᓯᒍᑎᐅᒻᒥᔪᖅ 2004ᒥ ᖃᐅᔨᓴᕐᓂᕕᓂᕐᒥᒃ ᑲᔪᓯᔪᒥᒃ ᐱᓇᓱᖃᑎᒌᑦᑐᐃᑦ ᐅᑯᐊᖑᑦᓱᑎᑦ ᐃᓄᓕᒫᓄᓕᖓᔪᓂᑦ ᐃᓗᓯᓕᕆᓂᕐᒥ ᐱᒍᑦᔨᕕᒃ ᐃᓕᓐᓂᐊᕕᕐᔪᐊᖓᓂ ᓚᕚᓪ ᐋᓐᓂᐊᕕᒃ ᑯᐯᒃᒥ ᖃᐅᔨᓴᕐᓂᒧᓕᖓᔪᖅ, ᐱᒍᑦᔨᕕᖓ ᑯᐯᒃᓕᒫᒥ ᐃᓗᓯᖃᑦᓯᐊᕆᐊᖃᕐᓂᖏᑦ ᐃᓄᖁᑎᖏᑦ ᑯᐯᒃᒥ ᐊᒻᒪᓗ ᓄᓇᕕᒻᒥ ᐃᓗᓯᓕᕆᓂᕐᒧᑦ ᑲᑎᒪᔨᒃᑯᖏᑦ ᐊᖓᔪᕐᖃᐅᕕᒋᑦᓱᓂᐅᓗ ᑲᑎᖕᖓᔨᐅᕕᒃ ᑲᒪᒋᔭᑦᓴᖃᕐᓱᑎᓗ ᖃᐅᔨᓴᕐᓂᓕᒫᒥᒃ.


ᐊᑯᓂᓂᐋᓗᒃ ᑲᑐᑦᔨᖃᑎᒌᓐᓂᖏᑦ ᐃᓚᐅᑎᑕᐅᓂᖏᓪᓗ ᓄᓇᓕᓕᒫᓂ ᐱᓇᓱᖃᑎᒋᓲᖏᑦ ᐅᑦᑑᑎᒋᓗᒍ ᑲᑎᕕᒃ ᓄᓇᓕᓕᒫᑦ ᑲᕙᒪᖓ ᐊᒻᒪᓗ ᒪᑭᕝᕕᒃ ᑯᐊᐳᕆᓴᓐ ᓲᖑᓯᐅᒥᑎᑦᓯᓂᐊᕐᖁᑦ ᓄᓇᕕᐅᑉ ᓄᐃᑦᓯᒍᓐᓇᓂᖓᓂᒃ ᓈᒻᒪᓈᑦᓯᐊᑐᒥᒃ ᐃᓗᓯᖏᑦ ᖃᓄᐃᓕᖓᓕᕐᒪᖔᑕ ᓄᓇᓕᖁᑎᖏᓐᓂ ᖃᓄᐃᓘᕆᐊᓂᐊᓕᕐᒪᖔᕐᒥᓗ ᓯᕗᓂᕐᒥ. 
ᖃᓄᐃᓕᕐᐱᑖ? 2017 ᖃᐅᔨᓴᕐᓂᐅᔪᖅ ᑲᔪᓯᑎᑕᐅᑦᓱᓂ ᐃᓄᓐᓄᓕᖓᔪᖅ ᖃᐅᔨᓴᕐᑕᐅᓱᑎᓗ ᐃᓄᓐᓄᑦ. ᖃᐅᔨᒍᑎᐅᔪᑦ ᖃᐅᔨᓴᕐᓂᒥ ᓄᐃᑦᓯᓂᐊᕐᖁᑦ ᓄᓇᕕᒻᒥᐅᑉ ᐱᐅᓕᐊᑦᓯᐊᕈᓐᓇᓂᖏᓐᓂᑦ ᓄᐃᑕᑎᑦᓯᒋᐊᓪᓛᕈᓐᓇᓂᖏᓐᓂᑦ ᐃᓗᕐᕈᓯᕗᓐᓂᑦ, ᐅᖃᐅᓯᑦᑎᓂᑦ ᑭᓇᐅᓂᕗᓐᓂᓗ. ᓲᖑᓯᐅᒥᑎᑦᓯᓂᐊᕐᓱᓂ ᓯᕗᓕᕈᓐᓇᓂᕗᓐᓂᑦ ᖃᓄᐃᓘᕐᓂᕗᓐᓂᓗ ᐱᐅᓯᐅᒥᑎᑦᓯᒋᐊᕐᓗᓂ ᐃᓗᓯᓕᕆᓂᕐᒥᒃ ᖃᓄᐃᖕᖏᓯᐊᕐᓂᓕᕆᓂᕐᒥᓗ ᐃᓘᓐᓇᖏᓐᓂᑦ ᓄᓇᓕᓐᓂᑦ. 


ᑐᑭᓯᒪᓂᖅ ᐱᒍᓐᓇᓯᑎᑦᓯᓂᐅᕗᖅ. ᐊᒻᒪᓗ ᐱᒍᓐᓇᓯᓂᖅ ᓄᐃᑦᓯᓲᖅ ᓇᒻᒥᓂᖅ ᐊᐅᓚᑦᓯᒍᒪᓂᕐᒥᒃ. ᐃᓚᒋᕙᐅᒃ ᐃᓚᖏᑦᑕ ᑐᕌᒐᖏᑦᑕ ᐅᖃᕐᑕᐅᒪᔪᑦ ᐃᓄᓕᒫᕐᓯᓂᖃᖃᑦᑕᑎᓪᓗᒋᑦ ᐸᕐᓇᓯᒪᐅᑎᒃ ᑖᓐᓇ ᓄᐃᑦᓯᒍᑎᒋᑦᓱᒍ ᑕᑯᓐᓇᐅᔮᕐᑕᕗᓐᓂᑦ ᓯᕗᓂᕐᒥ. ᖃᓄᐃᓕᕐᐱᑖ? 2017 ᑭᖕᖒᒪᓇᓪᓚᕆᑦᑐᖅ ᐃᑲᔪᕐᓯᒍᑎᐅᓂᐊᕐᓱᓂ ᑎᑭᐅᑎᒍᒪᔭᕗᓐᓂᑦ ᑐᕌᒐᕗᓐᓂᑦ.

ᖃᓄᐃᓘᓛᕐᖃᑦ:

ᐱᓇᓱᑦᑎᑦ 40ᐅᓛᕐᑐᐃᑦ ᐃᓚᐅᑎᓪᓗᒋᑦ ᐋᓐᓂᐊᓯᐅᕆᓂᕐᒥᒃ ᐱᓇᓱᑦᑎᒪᕇᑦ, ᐊᐱᕐᓱᑏᑦ, ᐊᐅᖏᕐᓯᕕᒻᒥ ᐱᓇᓱᑦᑏᑦ ᐊᒻᒪᓗ ᖃᐅᔨᓴᕐᑎᒪᕇᑦ ᐅᒥᐊᕐᔪᐊᒦᓛᕐᑐᑦ ᑲᓇᑎᐊᓐ ᐃᒪᕐᐱᓕᕆᔨᒃᑯᑦ ᐅᒥᐊᕐᔪᐊᖓᓂ ᐊᒧᓐᑦᓴᓐ ᖃᐅᔨᓴᕆᐊᓯᓗᑎᓗ ᐊᐅᒡᒍᓯ 19ᒥ ᑰᑦᔪᐊᕌᐱᒻᒥ.


ᐱᓇᓱᐊᕈᓯᖏᓐᓂᑦ ᓯᑕᒪᐅᔪᖕᖏᒐᕐᑐᓂᑦ ᐅᒥᐊᕐᔪᐊᖅ ᑕᕐᕋᖓᓅᕐᓗᑎᑦ ᑕᓯᐅᔭᕐᔪᐊᑉ ᓯᓈᖓᑎᒍᑦ, ᓄᕗᒻᒧᑦ ᐊᒻᒪᓗ ᐅᖓᕙᒧᑦ ᓄᕐᖃᖃᑦᑕᓗᑎᑦ ᐃᓘᓐᓇᖏᓐᓂᑦ 14ᓂᑦ ᓄᓇᓕᓐᓂᑦ ᓄᓇᕕᒻᒥ ᐱᔭᕇᕐᓗᓂ ᑰᑦᔪᐊᒥ ᐅᑦᑑᐱᕆᒥ. (ᑕᑯᒋᐊᕐᓗᒍ ᐊᒧᓐᑦᓴᓐ ᑎᑭᕝᕕᓴᖏᑦ ᓄᓇᓕᓐᓄᑦ)


2000ᒐᓚᓐᓂᑦ ᐃᓄᖁᑎᖏᓐᓂᑦ ᐃᓚᐅᖁᔨᕗᑦ ᖃᐅᔨᓴᕐᓂᒧᑦ. ᑎᒡᒍᐊᑕᐅᖃᑦᑕᓛᕐᑐᑦ ᑭᓇᑐᐃᓐᓇᐅᒐᓗᐊᕈᑎᒃ ᐱᓇᓱᑦᑎᓄᑦ ᖃᐅᔨᓴᕐᑕᐅᔪᑦᓴᓂᑦ ᓄᐊᑦᓯᔨᓄᑦ ᓄᓇᓕᓕᒫᓄᖃᑦᑕᓛᕐᑐᓄᑦ ᐅᒥᐊᕐᔪᐊᖅ ᓄᓇᓕᖓᓅᓚᐅᕐᑎᓇᒍ. ᐃᓚᐅᓃᑦ ᑭᖕᖒᒪᓇᕐᖁᖅ ᖃᐅᔨᓴᕐᓂᖅ ᑲᔪᓯᑦᓯᐊᓂᐊᕐᐸᑦ. ᖃᐅᔨᓴᕐᑕᐅᔪᑦᓴᓂ ᓄᐊᑦᓯᔩᑦ ᓱᕐᕙᑕᕆᐊᕐᑐᓕᕐᐸᑕ ᐃᓕᑦᓯᓄᑦ ᐊᖏᕆᑦ!
ᑲᑎᓕᒫᕐᓱᒋᑦ 1,000ᒐᓓᑦ ᐃᓚᐅᔪᐃᑦ ᐅᑭᐅᓖᑦ ᐊᑯᓐᓂᖏᓐᓂᑦ 16 ᐊᒻᒪᓗ 30ᓂᑦ ᑎᒡᒍᐊᑕᐅᓛᕐᖁᑦ. 1,000ᒋᐊᓪᓓᑦ ᐃᓚᐅᔪᑦ 31ᓂᑦ ᐅᑭᐅᓖᑦ ᐊᖓᔪᑦᓰᓗ, ᐃᓚᖏᑦ ᖃᓄᐃᑉᐱᑖ 2004ᒥ ᖃᐅᔨᓴᕐᓂᒥᒃ ᖃᐅᔨᓴᕐᑕᕕᓃᑦ, ᖃᐅᔨᓴᕐᑕᐅᔪᑦᓴᐅᓗᑎᑦ ᑎᒡᒍᐊᑕᐅᓛᕆᕗᑦ. ᐃᓚᐅᔪᓕᒫᑦ ᐊᑎᓕᐅᕐᓯᒪᒋᐊᖃᓛᕐᑐᑦ ᐊᖏᕐᓂᕃᒍᑎᒥᒃ ᐃᓚᐅᓚᐅᕋᑎᒃ ᖃᐅᔨᓴᕐᓂᒧᑦ.


ᐃᓚᐅᔪᓕᒫᑦ ᐅᒥᐊᕐᔪᐊᒨᕐᑕᐅᓛᕐᑐᑦ ᓯᒃᑭᑖᓗᒃᑯᑦ ᖁᓕᒥᒍᓕᑎᒍᓗᓐᓃᑦ, ᓯᓚᖓ ᐃᑉᐱᒋᓗᒍ. ᐅᒥᐊᕐᔪᐊᒥᓕᕈᑎᒃ ᑎᒥᒥᑎᒍᑦ ᖃᐅᔨᓴᕐᑕᐅᖃᑦᑕᓛᕐᑐᑦ ᐊᐱᕐᓱᑲᑦᑕᑕᐅᓗᑎᓗ.
ᖃᐅᔨᓴᕐᓂᖅ ᐃᓗᓕᑕᖃᕐᒥᔪᖅ ᓄᓇᓕᒻᒧᓕᖓᔪᒥᒃ ᖃᐅᔨᒍᑎᐅᔪᐃᑦ ᐊᑐᕐᑕᐅᓛᕐᒪᑕ ᐱᕙᓪᓕᐊᑎᑦᓯᓂᕐᒥᒃ ᓄᓇᓕᒻᒦᑐᓂᑦ ᖃᐅᔨᓴᕐᓗᑎᓗ ᖃᓄᐃᖕᖏᓯᐊᕐᓂᖓᓂ ᓄᓇᓕᐅ. ᖃᐅᔨᒍᑎᐅᔪᑦ ᐃᑲᔪᕐᓯᒍᑎᑦᓴᓯᐊᒻᒪᕆᐅᓛᕐᑐᖅ ᐃᑲᔪᕐᓯᓗᓂ ᓄᓇᓕᒻᒥ ᐱᒋᐊᕐᑎᓯᒍᑎᐅᓗᓂ ᐊᑦᔨᒌᑦᑐᓂᑦ ᑐᕌᒐᒋᔭᐅᔪᓂᑦ. ᐊᑦᔨᒌᖕᖏᓂᖏᓐᓂᑦ ᑕᑯᒍᑎᑦᓯᐊᖑᓗᓂ ᑲᔪᓯᑦᓯᐊᑐᓂᑦ ᐃᓚᖏᓐᓂᑦ ᓄᓇᓕᓐᓂᑦ ᐊᒻᒪᓗ ᓱᓀᑦ ᐱᐅᓯᒋᐊᕆᐊᖃᕐᒪᖔᑕ ᐊᓯᖏᓐᓂᑦ.  


ᓄᓇᓕᐅᑉ ᐃᓚᐅᑦᓯᐊᓂᖓ ᑭᖕᖑᒪᓇᓪᓚᕆᓚᖓᔪᖅ ᖃᐅᔨᓴᕐᓂᖅ ᑲᔪᓯᑦᓯᐊᓂᐊᕐᐸᑦ. ᓯᕗᓕᕐᑏᑦ ᐊᖏᕈᑎᖃᕐᓯᒪᕗᑦ ᑐᑭᓯᑎᑦᓯᓂᐊᕐᓂᒥᓂᒃ ᓄᓇᓕᒻᒥᓂᑦ. ᐃᓕᓐᓂᐊᕖᑦ, ᐱᓇᓱᕝᕖᑦ ᐊᒻᒪᓗ ᐯᕆᑦᓯᕖᑦ ᐱᓇᓱᖃᑎᖃᑦᓯᐊᓂᐊᕐᓂᒥᓂᒃ ᐅᖃᕐᓯᒪᕗᑦ ᐊᑐᐃᓐᓇᐅᑎᑦᓯᓗᑎᑦ ᐱᒍᑦᔨᒍᑎᓂᑦ ᐱᓇᓱᑦᑏᓗ ᓱᕐᕋᑕᐅᑎᓂᐊᕋᑎᒃ ᐃᓚᐅᓂᕐᒥᓄᑦ ᖃᐅᔨᓴᕐᓂᒧᑦ. ᐃᓚᐅᑎᑕᐅᒻᒥᔪᖅ ᐃᓚᐅᒍᒪᓕᕐᓭᒍᑎᐅᑦᓱᓂ ᐃᓚᐅᔪᓄᑦ $75ᓂᑦ ᓂᐅᕕᕐᓂᐊᕈᑎᒥᒃ ᐁᑦᑐᑕᐅᓛᕐᒥᔪᑦ ᓄᓇᓕᐅᑉ ᑯᐊᐸᖓᓂ ᐊᑐᕐᑕᐅᒍᓐᓇᑐᒥᒃ.


ᐊᒧᓐᑦᓴᓐ ᑎᑭᑉᐸᑦ ᓄᓇᓕᓐᓄᑦ, ᐊᓕᐊᓇᕐᑑᑎᓗᒍ ᓄᓇᓕᒻᒥᐅᑦ ᐊᓕᐊᓲᑎᖃᓂᐊᕐᒪᑕ ᑭᓇᒃᑰᓂᕐᒥᓂᒃ ᐅᖃᕈᓐᓇᓯᓗᑎᓗ ᓂᕆᐅᓇᕐᓂᓴᑦᓯᐊᒥᒃ ᓯᕗᓂᕆᒍᒪᔭᒥᓂᒃ.
ᑕᑯᓐᓇᕋᓱᒋᑦ ᖃᓄᐃᓕᕐᐱᑖ? 2017ᒥᒃ ᕓᔅᐳᒃᑯᑦ. ᑕᑯᓂᐊᓕᐅᒥᔮᕐᑕᓗᑎᓗ ᖃᕆᑕᐅᔭᑎᒍᑦ ᓄᐃᑕᑎᑕᐅᔪᒥᒃ ᑐᑭᓯᒋᐊᕐᓗᑎᑦ ᐃᓗᓯᕐᓄᓕᖓᔪᒥᒃ ᖃᐅᔨᓴᕐᓂᒥᒃ.


ᐅᓪᓗᖏᑦ ᑎᑭᕝᕕᓴᖏᑦ ᐊᒧᓐᑦᓴᓐ ᓄᓇᓕᓐᓂ:

ᐅᐸᑦᑕᖓ    :    ᐅᓪᓗᒃ ᑎᑭᕝᕕᖓ:        ᐅᓪᓗᒃ ᐊᐅᓪᓚᕕᖓ                                   

ᑰᑦᔪᐊᕌᐱᒃ:           ᐊᐅᒡᒍᓯ 19                 ᐊᐅᒡᒍᓯ 21
ᐅᒥᐅᔭᖅ:             ᐊᐅᒡᒍᓯ 22                 ᐊᐅᒡᒍᓯ 23
ᐃᓄᒃᔪᐊᒃ:            ᐊᐅᒡᒍᓯ 24                 ᐊᐅᒡᒍᓯ 29
ᐳᕕᕐᓂᑐᖅ:          ᐊᐅᒡᒍᓯ 30                 ᓰᑦᑏᒻᐱᕆ 4
ᐊᑯᓕᕕᒃ:             ᓰᑦᑏᒻᐱᕆ5                  ᓰᑦᑏᒻᐱᕆ 6
ᐃᕗᔨᕕᒃ:             ᓰᑦᑏᒻᐱᕆ 7                 ᓰᑦᑏᒻᐱᕆ 7
ᓴᓪᓗᐃᑦ:               ᓰᑦᑏᒻᐱᕆ 8                ᓰᑦᑏᒻᐱᕆ 12
ᑲᖏᕐᓱᔪᐊᖅ:        ᓰᑦᑏᒻᐱᕆ 13              ᓰᑦᑏᒻᐱᕆ 16
ᖁᐊᕐᑕᖅ:             ᓰᑦᑏᒻᐱᕆ 17              ᓰᑦᑏᒻᐱᕆ17
ᑲᖏᕐᓱᒃ:               ᓰᑦᑏᒻᐱᕆ 18             ᓰᑦᑏᒻᐱᕆ 19
ᐊᐅᐸᓗᒃ:              ᓰᑦᑏᒻᐱᕆ 20             ᓰᑦᑏᒻᐱᕆ 20
ᑕᓯᐅᔭᖅ:               ᓰᑦᑏᒻᐱᕆ 21             ᓰᑦᑏᒻᐱᕆ 21
ᑲᖏᕐᓱᐊᓗᑦᔪᐊᖅ:  ᓰᑦᑏᒻᐱᕆ 22             ᓰᑦᑏᒻᐱᕆ 25
ᑰᑦᔪᐊᖅ:                ᓰᑦᑏᒻᐱᕆ 26             ᐆᑦᑑᐱᕆ 5